Sa Malamig na Sahig

inilapat ko ang aking likod
sa magaspang at malamig
na sementadong sahig
upang makabitaw man lang kahit saglit
sa kuba nang likuran
pumapasang init.

subukin ko rin kayang dumapa?
butuhang dibdib naman ang bigyan ng ginhawa
makapalag at makatakas man lang pansamantala
sa gumagapos na init
patungo sa inaasam na lamig
nitong sahig.

ngunit, hindi pa rin marahil lalamig
dibdib sa pagitan ng nagkikiskisang poot, lungkot, pagkaligalig
nangyari na bang naapula ng lamig
apoy ng nakatutupok na katotohanang hindi masaid-said?

gayunpaman, sinubukan ko pa ring dumapa
inihalik ang dibdib
sa magaspang at malamig na sahig
lumalamong apoy sa dibdib nawala ngang bigla
nagbanyuhay naman
bilang basang luha't tuyong hika.

Minsan, May Tula

minsan, may tula

naisulat ngunit hindi nailathala

ng isang makata.

Tulang nanahan

sa tikom niyang damdamin

kaya marahil

ni isang taludtod

hindi niya kayang bigkasin.

Panahon ang sumulat ng

natatagong tula--

mula sa mga gunitang

salita lamang noong una,

naging taludtod mula noon,

naging saknong nang lumaon

at tuluyang naging tula

sa tagal ng panahon.

                    Mga kupas na ngiti

                                              sa lukot na larawan ng kahapon.

Ikinahon

                     sa nilulumot nang baul.

ibinaon.

minsan, may tula

sinulat nang minsang nagalak.

Tulang nakatarak, itinarak

sa pusong tumibok, nagpatibok

sa tagong damdamin ng iba o ng

kapwa makata.

Palarang liham at bulaklak

                                ng lihim na pagsinta
saka-kapit-bisignakasama.

                                                     Ibinulsa

sa kaliwang dibdib ng pulang polong

                                                    kupas sa kasusuot at kalalaba.

minsan, may tula

sinulat nang minsang nanabik

sa hindi makuha-kuhang laman.

Tulang inipon, ipinutok

ng pusong nagpasirit, nagpaputok

ng malapot na pag-ibig

                          sa pinaglalawayang katawan

ng alindog at libog

                                                   ipinutok
sa mangitimngitim na puting kumot

                                       na amoy pawis at zonrox.

minsan, may tula

nakayapak o nakatsinelas

may kamao, nakataas.

Tulang tinig

ng mga walang tinig

sumisigaw, umaalingawngaw

sa lunsod o kanayunan.

Tulang bumabantas

                                 sa mabatong landas

nadadapa man o nadudulas

tumatayo nang
                                 buong lakas.

Liham ng pulang pagsinta

                              sinulat sa mga plakard at bandera

                              gamit ay itim at pulang pintura.

Sumisigaw

                               sa langit ng tuyong lupang

                                               napaghaharian ng uring mapagsamantala.

minsan, may tula

minsan, may tumutula

minsan, ikaw ang may tula

minsan,

ikaw ang tula.

Lamig at Init ng Balang Tumama sa Batang si Stephanie

Malamig.

Singlamig ng balang

idinura

ng malamig ding baril

kaluluwa't damdamin

ng baliw sa baril

na nagpaputok

sa langit ng pag-aagawan ng liwanag at dilim

tumama

sa musmos niyang katawan

pumutol

sa paglalaro niya ng habulan at taguan

at humatol

sa sumisibol pa lang niyang kabataan.

Mainit.

Sing-init ng balang

ipinutok

ng baril na nag-init, umusok

luhang umapaw sa mugtong mata

at gumuhit

sa pisngi ng kanyang mga kaanak at kabata

nagbaga

sa ating kaisipan

nag-alab

sa ating kalooban

at naglagablab

sa ating kamalayan.